難忘與肥姐攻打四方城 謝賢教潛水
姜大衛表示現時久不久便會探望謝賢（圓圖）。
【明報專訊】姜大衛自詡朋友多沒敵人，早前拍《麻雀樂團》飾演麻將館話事人，令他回想當年跟一班圈中好友攻打四方城的日子，「當年麻將腳有謝賢（四哥）、狄波拉、沈殿霞（肥姐）、胡錦、張沖，狄龍和陳觀泰間中會落場，肥姐真的很鍾意打麻將，有時會開定枱等我們收工，多數在我租住的千呎住所打牌，我屋企好似總部，現在我已很少打麻將，不如仙姐（白雪仙）咁犀利，好精靈計番數」。除打麻將，他與一大班朋友還有相約打保齡球和壁球，後期又轉了出海滑水和潛水，「是四哥帶我們玩，他買了艘船，我又買了艘船一齊出海，當時買船平過買車，加入遊艇會也不昂貴，潛水也是四哥教的，但大家睇完電影《大白鯊》就不敢玩，當時西貢真的出現鯊魚，我連艘船都送了給朋友」。
姜大衛透露過往貪玩的四哥現已較少出來聚會，去年到過對方家中探望，「之前大家出來食飯，他夠鐘就要返屋企，變了宅男，現在不是太肯出街，我久不久會探望他，他已88歲了，算係咁啦！都好精神」。他說現在見得最多的老友是胡楓，經常相約食飯及結伴睇演唱會。
