羅天宇比賽搵命博 周志康望殺入《中年4》三甲. 藝人羅天宇同周志康早前齊齊挑戰《中年好聲音4》。身為緊張大師嘅天宇表示今次係燃燒生命去比賽，每次上場心跳爆錶，笑言「命都短幾年」。而本身歌唱比賽出身嘅志康表現獲激讚，被睇好劍指三甲，佢直言唱歌對佢嚟講係終身事業，若將來工作量九成都圍繞音樂，簡直求之不得。

羅天宇同周志康由公司同事、波友「升呢」到好兄弟，最近更成為戰友一齊參加《中年4》，天宇最終24強止步，志康就成功殺入18強。同屬I人嘅佢哋今次離開舒適圈勇敢挑戰，尤其天宇本身唔係歌手出身，坦言相當緊張。每逢開新劇例必失眠同生白頭髮嘅佢，話今次比賽嘅緊張程度創人生高峰：「比賽現場我一定係心跳率冠軍，我估有140、150，大家唔止聽到我嘅心跳聲，隔住件衫都會見到個心跳，真係好恐怖。」志康雖然大讚兄弟勇敢，但亦直指覺得天宇有啲心率問題。天宇揚言用生命去比賽：「我覺得參加咗呢個比賽我命都短幾年，因為心臟負荷太大。」佢笑言有人曾提議佢服用鎮靜劑，隨時要自備心臟起搏器同氧氣罩。

《超級巨星》出身嘅志康雖然有比賽經驗，唔似天宇咁緊張，但佢指都因為比賽而生白頭髮，試過因揀咗一首唔太熟悉嘅歌，加上綵排唔理想，比賽前晚嚴重失眠兼萌生改歌念頭，好彩最後效果反而唔錯。談到唔少人對佢寄予厚望，佢話對自己都有信心，坦言：「我知道自己嘅實力，係可以唱得好好，但目前為止最好都只係發揮到八成，平均只有六、七成。好多人都遺忘咗我係鍾意唱歌嘅人，其實觀眾唔討厭已經好幸福，睇節目嘅觀眾都好友善、好有同理心，收到好多正面評語，好多謝佢哋。」

天宇為咗參賽搵咗五位來自內地、台灣及外國嘅唱歌老師指導，誠意十足，雖然最終被淘汰，但佢已覺收穫滿滿：「《中4》係一個雞精班，除咗有評判指導，參賽者都係高手，真係會遇強愈強，令我急促成長。」佢話以往每次拍劇都會向監製自薦唱劇集歌，但每每落空，所以希望藉住今次比賽建立大家對佢唱歌方面嘅信心，最理想係演戲同唱歌工作量各佔一半。志康直言唱歌對佢嚟講係終身事業，若將來工作量九成圍繞音樂，佢簡直求之不得，但一切都要睇公司安排。問到會唔會期望兩人一齊開演唱會，佢話：「當然好想，所有表演都係自己安排，相信會好享受，亦冇比賽咁大壓力。」

兩人比賽第二，友誼第一。志康大讚天宇係佢喺圈中認識嘅人之中最善良嘅一位：「我對善良嘅人係抗拒唔到，加上大家又傾到心事，佢好關心我、好細心又有禮貌。」佢揚言如果自己係女仔，一定會鍾意對方：「就算佢唔鍾意我，我都會溝佢，我係誓要得到呢個男人，我真係會。」天宇話兩人因多年前一齊組籃球隊打街場而打出兄弟情，並視對方為家人：「雖然佢年紀上細過我，但感覺上好似我哥哥，因為我細個好自閉，成日收埋自己，出來工作都冇辦法望住人哋對眼講嘢，有社恐。依家一個訪問講嘅嘢係我以前一年嘅說話量，待人處事同表達係零。佢好肯同我分享，會教我待人處事同價值觀。」TVB