莊子璇剖白《魔音女團》心聲：誰都可以發光，只要找對地方. 《魔音女團》最終6人成團名單出爐，包括喬美莎、倪樂琳、倪嘉雯、盧映彤、宋宛穎同莊子璇。相隔多日，莊子璇喺社交網發文訴心聲，以《凡星》歌詞開首：「誰都可以發光，只要找對地方。」

莊子璇透露經過好多掙扎先決定參加《魔音》：「一路以嚟我都清楚睇到網上好多負評、好多惡意嘅聲音，我好清楚如果我上呢個節目，就一定會面對質疑、會俾人鬧。」佢承認一開始會畏縮、猶豫，但最終決定勇敢一次：「我想俾自己一個機會，想證明一次，我都有屬於自己嘅光芒。」

提到賽後有人對成團名單質疑，莊子璇坦言：「其實我好明白。追夢本來就冇辦法討好所有人。每個人都有自己嘅喜好同偏心，大家為自己心水嘅選手抱不平、有情緒，我完全理解、亦都唔會怪任何人。但我一路相信：每一個站上鏡頭前嘅人，都付出過無人見到嘅眼淚、緊張同堅持。」又話：「希望大家可以用多少少時間，慢慢見證我哋嘅進步同真心。」

莊子璇感嘆比賽時光太短，未能盡情釋放自己：「其實我心入面仲有好多未攞出來嘅熱血、好多未展示嘅一面。如果時間可以再多啲，我真係好想俾大家見到，一路努力進步、不斷突破嘅我，究竟可以變成點樣。但係即使旅程短暫，呢段成長絕對真實、絕對珍貴。」TVB