【On.cc】蕭正楠做老竇心態改變　唔再盲目「衝鋒陷陣」

藝人蕭正楠今午（10日）出席《魔音女團》宣傳活動。受訪時問到他是否歸心似箭，想早些回家陪伴太太黃翠如過母親節，他冧爆說：「我又冇乜驚喜準畀佢喎，我依家好呆，一個人湊咗20幾日囝囝呀！」阿蕭笑指反過來翠如給了自己一個大大的驚喜：「佢話畀我聽邊日返嚟，我同佢講我帶埋個仔開車去機場接佢，點知佢早咗一日返嚟，失驚無神推門入嚟，跟住我陪佢去公園搵囝囝，個仔呆咗3秒就認得出佢，翠如即刻放下心頭大石嘞，事關佢成日驚錯過咗好多！」

阿蕭指自己早前到澳洲拍攝旅遊節目，返港時囝囝也反應爬大：「本來佢換緊片嘅，一見到我就哈哈大笑，嗰晚笑咗好耐。（係唔係好唔捨得出埠嘞？）其實經過咗翠如呢次，我都覺得應該係最後一次嘞，我哋真係唔好離開太耐，就算拍嘢都盡量縮短時間，好似我嚟緊去美國登台，都係前後幾日就返嚟。」

他直認當了父親後自己心態很不同，不會再盲目「衝鋒陷陣」，想留多點時間陪伴家人。問到倘若出埠拍劇的話如何打算，阿蕭笑言：「好彩啦，依家都冇乜劇拍啦，哈哈！」談到日前於中山舉行演唱會，他即謂：「成個四月都好忙，當時狀態好差，開騷前把聲爛嘅，好彩我妹肯留喺香港幫我湊囝囝，亦都要多謝苗僑偉、黃日華及曹永兼等一班好兄弟幫忙，尤其阿廉真係要畀10個Like 佢，佢全日好似我貼身保鏢咁，所有嘢幫我安排得妥妥當當，有佢喺度我真係太快樂。（請佢食飯？）咁都唔夠表達我嘅心意。」

談到劇集《公公出宮》拍檔李家鼎的狀況，阿蕭無奈表示：「佢嘅家事我唔應該講，不過我親眼睇住佢啲幾年狀態真係冇咁好，攰咗囉，我希望佢家庭嘅嘢唔好再咁上心，盡量顧咗自己嘅健康為先。（你嘅育兒心態係點？）我真係比較嚴，有時話咗唔得嘅嘢就堅決唔畀囝囝做，哪怕佢喊到拆天，真係唔會放縱佢，佢依家歲幾，要由細就畀概念佢，有啲嘢唔得就唔得。」

蕭正楠做老竇之後心態有改變。

蕭正楠唔再盲目「衝鋒陷陣」。

蕭正楠想留多點時間陪伴家人。

蕭正楠一家三口，幸福美滿。

萧正楠