卡斯柏舒米高宣布掛靴👋

39歲嘅卡斯柏舒米高表示同些路迪合約到六月尾屆滿時，將會結束球員生涯。佢透露自己就膊頭傷患諮詢過多位外科醫生同相關專家嘅意見，佢哋都認為唔好期望可以重返高水平，佢自己經過深思熟慮之後，亦都相信係適合嘅時間告別嘞。

卡斯柏舒米高為丹麥國家隊上陣120場，佢爸爸彼得舒米高就喺國際賽踢咗129場，仔仔協助丹麥晉身2021年歐洲國家盃四強，爸爸就喺1992年幫丹麥封王。

丹麥足總總監彼得慕拿表示計劃當丹麥國家隊返回位於首都哥本哈根嘅柏堅球場作賽時，為卡斯柏舒米高舉行告別儀式。丹麥喺九月尾、10月初接連有兩場主場嘅歐洲國家聯賽比賽。🇩🇰