林子博鬧爆後輩採訪唔做功課 賴彥妤慘成嫌疑人澄清：冇合作過.前TVB娛樂新聞台主播林子博日前在直播中大爆當年帶新人嘅血淚史，直言遇過唔少「極度不受教」嘅後輩，更曾因一個低級嘅「災難級錯誤」而當場發火鬧人，矛頭直指前港姐。事件隨即在網上掀起熱烈討論，唔少網民化身「偵探」猜測女主角身份，有人將矛頭直指曾因採訪屢次鬧出風波嘅賴彥妤，懷疑佢就係當事人。今日（19日）賴彥妤現身葵芳出席活動時，正面作出澄清同回應。

對於被網民列入懷疑名單，賴彥妤坦言有留意到呢單新聞，睇到時感到相當意外。佢解釋：「首先我都有睇到呢單新聞嘅時候係有啲意外。因為子博前輩其實係佢離職公司嘅時候呢，我都未入去嘅，咁所以其實就冇真正咁樣合作過嘅，同埋我一向都聽話嘅。」被問到網民嘅暗指同猜測有冇為佢帶來困擾，佢抱平常心面對，笑言當作一種鞭策：「咁又冇嘅，經一事長一智啦。可能啱啱入行嘅時候，自己嘅做主持技巧未必係咁好，我都好想跟啲前輩學嘢，所以歡迎各位前輩指導下我啦！」

面對網民對佢「唔做功課」嘅質疑，賴彥妤即席拿出手機，大方展示自己工作前嘅準備功夫，力證每次採訪都有認真做功課：「我會㗎！我畀個電話大家睇，其實我習慣咗，有時我哋㩒緊電話，其實就唔係玩緊手機嘅。平時我會打晒啲資料喺個手機入邊，出去做訪問或者拍攝工作之前，都一定會塞晒入個腦袋先。自己習慣用呢個方法令自己入腦，至於其他主持技巧或者臨場反應嗰啲，就更加需要訓練啦。」

至於林子博口中嗰位「唔做功課嘅後輩」究竟係邊個，賴彥妤話自己毫不知情。佢透露自入行以來，遇到嘅前輩都非常友善同照顧後輩，令佢獲益良多：「呢個就真係唔係好知啦。因為我入行以來好多同事、前輩全部都好好㗎！好Nice㗎！特別係啱啱入行嘅時候，有啲前輩直情捉住我，同我傾偈：『你要加油啊！邊度要留意啊？點樣可以做得好啲啊？』我自己本身都好鍾意學嘢，跟住就會忍唔住捉住前輩問好多嘢。」佢強調自己一直好努力學習，歡迎前輩指教。