【娛樂新聞】古天樂紅館騷座位表流出 粉絲哀嚎「絕望座位表」 火速加開澳門場.入行33年嘅古天樂（古仔）將於8月21及22日首度踏上紅館舞台，舉行《古天樂 LOUIS KOO MY FIRST SHOW》。優先訂票及公開售票全數秒殺售罄，大批未能撲到飛嘅粉絲喺網上跪求加場，但古仔日前喺記者會上已揚言「夠用就夠，唔好加長（場）」。

近日網上流傳疑似古仔四面台個唱嘅座位表，票價分為1,080、880、680及480港元，四種票價嘅比例中，1,080、880、680數量相約，最平嘅480元最少，而佔最大多數嘅「灰色位置」，有傳係贊助商嘅優先訂票飛，令公開發售門票數量極為有限，被網民戲稱為「絕望座位表」。

不過，想捧古仔場嘅粉絲原來仲有機會！主辦單位日前宣布，為答謝未能成功購票嘅樂迷，緊接香港紅館場，鐵定於8月29日及30日登陸澳門，連開兩場。今次係古仔首度將個人騷移師到澳門舉行，佢亦表示：「真係估唔到大家反應咁熱烈，亦冇諗過自己今次會以歌手身份唱到過大海，8月澳門見！」古仔首次紅館騷掀撲飛熱潮，加開澳門場勢必再引起新一輪搶飛戰。