【娛樂新聞】黃宗澤驚喜開金口唱《千千闕歌》掀洗版潮 自爆緊張成個月：我唔會重返樂壇.男神黃宗澤（Bosco）近年主力在影視圈發展成績亮麗，曾經出唱片做歌星嘅佢，早已宣告「退出樂壇」。但昨日（5日）佢盛裝出席喺山東煙台舉行嘅《2026中國電影導演之夜》時，驚喜開金口唱歌，成全晚焦點，演出片段喺網上瘋傳，掀起一陣洗版潮。

Bosco先以一身「西裝骨骨」嘅黑色禮服踏上紅地氈，一出場引來全場粉絲尖叫，大讚「好靚仔」、「逆生長」。之後佢換上另一套白色西裝，搖身成為表演嘉賓，深情唱出經典名曲《千千闕歌》！久未在公開場合唱歌嘅佢，一開口便驚艷全場，演出水準相當高，深情演繹配合穩健台風，引來台下掌聲雷動。大批網民喺社交平台「洗版式」留言，高呼：「Bosco唱歌原來咁好聽！」、「跪求黃宗澤重返樂壇！」

網上好評如潮，但台下嘅Bosco其實係「頂硬上」。佢受訪時一邊抹汗，一邊笑指自己頂住巨大壓力：「太耐冇唱歌，下面有咁多大導演喺度，點會唔緊張啊？非常緊張！今次當挑戰下自己啦，咁耐冇唱。不過大家放心，我係唔會重返樂壇嘅，哈哈。」Bosco更自爆為咗呢幾分鐘嘅演出，私底下備戰咗好耐：「我緊張咗成個月啊！我都係乖乖哋返去演戲啦，呢啲當業餘玩吓啫。」

被問到日後可會考慮唱返自己主演劇集嘅主題曲，為粉絲謀福利，佢隨即耍手兼擰頭，幽默回應：「劇嘅主題曲，都係搵返啲專業嘅（歌手）啦！我只係路過㗎咋啫，路過㗎咋！」Bosco一再強調自己只係「業餘路過」，但呢次驚喜演出，無疑為全網觀眾帶嚟最震撼嘅音樂彩蛋。TVB