【娛樂新聞】郭富城舊愛姚正菁宣布復出 坦言對40年前Puppy Love已淡忘：點解要介意同場？

天王郭富城（城城）舊愛姚正菁今日（6日）出席簽約儀式，在經理人林宝玉陪同下簽約加盟新公司，宣布正式復出，獲圈中好友羅蘭及盧海鵬等到場支持。姚正菁受訪時直言心情興奮：「離開呢行太耐，依家當自己係新人！」佢透露會向唱歌、拍短劇及直播等多方向發展，笑言仍有戲癮，更已開始錄歌，暫時錄好4首歌，稍後會拍攝MV。對於以「新人」姿態復出，佢笑問自己可會角逐樂壇新人獎：「吓！真係㗎？」坦言自己唔係唱家班，要努力練歌練氣。

講到舊愛郭富城，姚正菁坦言雙方已多年冇聯絡，對戀情亦已淡忘：「點解要介意（同場甚至合作）？都唔係幾記得啦，以前啲Puppy love，40年前嘅事。」佢自爆早前同朋友欣賞咗城城澳門站演唱會：「好嘢呀！佢好勤力！咁啱朋友有飛我又喺澳門，所以入去睇吓。」至於久休復出通常惹人揣測感情狀況，佢直認已單身多年，期間有拍拖但已分手一段時間，認為婚姻與感情冇標準答案：「冇話邊個啱邊個係錯，邊個對唔住邊個，只係唔適合就離開。」

姚正菁坦言復出係機緣巧合，因自己開設內地社交平台後，發現有不少粉絲仍記得佢當年劇集《俠客行》中嘅角色「倪冬兒」，呢份支持令佢決心復出。佢透露已結束之前嘅時裝和寵物生意，移居返港全心投入娛樂圈。育有兩女嘅佢，透露女兒已分別29和25歲，細女曾參加加拿大華裔小姐比賽，笑言女兒已長大各有各世界，家人會支持佢復出。姚正菁當年與城城分手後，曾接演多部尺度較大嘅電影，轟動一時，1995年拍完《雷霆行動》後退出演藝圈，遠赴新西蘭嫁給富商，離婚後定居上海搞時裝生意，如今強勢回歸，備受關注。