杨千嬅11月回归红馆再出发 “有些东西要从人生中减去”│封面故事
完成大型世界巡演《My Tree of Live》后，杨千嬅终于返回香港舞台——红馆。
于今年一月世巡的广州尾站，千嬅竟然把整个歌单reversed，把毁灭后重新拼凑生命之树的过程，变成火鸟在浴火重生！reversed rundown寓意生命循环，结束也是开始，即将举行的红馆骚，千嬅只把世巡火鸟的白色羽毛在海报中重现，其他都是为香港歌迷重新安排，还有一个前所未有的红馆舞台设计。
他乡遇故知，在其他地方开骚看到香港歌迷，千嬅会特别感动，所以这场红馆骚，她都是为歌迷而设，“我真係好感激佢哋嘅勇气，追星其实都好需要勇气，我好清楚，因为自己係被追嗰个，大家都係烈女！”千嬅三十年，由红馆再出发，她说，一切都是最好的安排。
完成五十三场《My Tree of Live》世巡后，千嬅在最后一场完骚后的庆功宴，邀请所有台前幕后狂欢，在庆功宴上千嬅特别感触，她说︰“其实做完《My Beautiful Live》(一九年展开的世巡，期后因疫情而取消）之后，嗰一刻有谂过真係要退落嚟做返妈妈，又遭遇到一啲人生经历和历练，可能个天觉得我仲有嘢未做完，要我继续，于是又用了五年筹备这个tour，发现咗自己仲有好多空间，仲可以继续。”
千嬅直言今次红馆的档期得来不易，“我记得今年一月中完成巡演啦，本来谂住完咗之后休息下，因为身体有啲小问题，又想陪下屋企人，打算录埋张唱片，休息九个月至一年左右！嗰日庆功宴饮到醉晒，大家喊到好似有今生冇来世咁，因为大家由第一日做到尾，差唔多两年时间，真係唔知会唔会再见？去到三、四月，突然话红馆有期，因为十一月这个档期，其实係有人退出，主办都未问，我就申请了，佢哋都知我想做嘛，呢件事真係好梦幻，可能之前试咗咁多次都攞唔到，不过我又唔觉得係坏事，一切是最好的安排，依家回头睇，呢个时机都几好，十一月係Thanksgiving（感恩节）嘛！”
拣十次我都会拣红馆
她继说：“我记得收到红馆有期那一刻，我身边班同事仲感动，我仲未来得及消化，因为个仔返嚟香港读书好多嘢要搞，一时间打乱晒个计划，但都冇办法，大家都决定做，但有一样嘢，我自己就好似好镇定，点解呢？因为我哋去到每一站、每一场，都会谂起一啲歌，大家成日话，呢首返香港要再唱一次，但都只係讲讲下，但个rundown同个骚入面内容，原来不经不觉已经出现咗，直到真係开始通知大家，我哋真係开show喇，大家个心情真係好惊喜！”
每次踏上红馆，千嬅说，感受都很深很深，“我自己当然好开心，其实我中间都上过红馆做过几次嘉宾，每次感觉都很深，老实讲，又有点伤感，感觉熟悉又陌生，但只有红馆先有嗰种情怀，期间主办方一直叫我换去其他场地，问我点解要咁固执？香港有咁多新场地，仲有大型体育场，今次世巡都开过好多次体育场，觉得我都已经准备，经验都好丰富啦，但我都唔知点解，你叫我拣十次，我都会拣红馆，唔关人数事、唔关场数事，因为红馆对我嚟讲，係我音乐路上一个里程碑，就算俾一个更大场地我，都做唔到嗰种凝聚力！今次真係为香港而设，係一个全新演出，广州尾场唱《火鸟》时，嗰条白色羽毛掉下来，依家回到演唱会poster，终于可以回来了！”
杨千嬅的香港故事，由广东歌、港产片甚至港剧都有出现，她把世巡的歌单全拣广东歌，又成功激活了不少歌曲，“其实我有啲歌比较冷门，但我依家都分唔到，因为做完今次巡演之后，好多我以为冷门嘅歌，原来大家都识唱，因为依家係社交媒体年代，大家随时都可以搵返嚟听。我喺唱片公司长大，成日觉得要第一主打、第二、第三主打先算hit，原来如果我係普通歌迷，买碟都唔会理佢咩主打，锺意听咩歌就听咩歌，有几首我真係好意外，《寒舍》、《河童》、《稀客》喺巡演中段开始hit返，有啲歌我甚至冇唱过live，《偷生》真係最癫，嗰阵时静静鸡录咗，都唔记得摆咗几耐，唱片公司每年都要还歌数，你点估到呢首歌，可以去到咁北？大家都识唱！”
有些东西要从人生减去
今次红馆的歌单，千嬅讲到明有一半都不是当年的主打歌，“今次我会全程由自己主导，老实讲有一半唔算係主打歌，依家再唱返这些歌，每一首感觉都同以前唔同，可能係我对歌词嘅体会，或者自己人生走过嘅种种经历，先发现呢几年，我最感激係将所有歌词走过一遍，有些歌，真的发生过。我觉得依家呢个阶段，我有很多话想讲，我亦唔确定下次仲会唔会有呢个机会去做，毕竟人已经咁大，我呢一刻想同大家分享，杨千嬅从这个起点再出发，当我再望向未来係会抱着一个咩心情呢？我做咗呢个行业三十年，有时候觉得长、有时又觉得短，在这场音乐人生中，其实我真係领悟好多、收穫好多！从一开始只想不断增加，到现在开始懂得，有些东西要从人生中减去，这个过程，我一直在认识自己，我希望大家睇完个骚，可以鼓励到自己。”
问到千嬅今次红馆的舞台，她只肯透露三面台，但有四面台的感觉，“导演仲夸张，年半前已经谂到个台点玩，呢个设计大家一睇已经好有感觉，当时就更加期待返香港演出，係一个三面台，但感觉就似四面台，我唔知点同你解释，因为唔可以咁早穿（桥），总之今次，唔单止係回顾嘅纪念演唱会啦！”
花絮摄影：洪志富
形象：Tung Kam、Haley Chau
化妆：Ling Chan
髮型：Heitai Cheung、Taurus Lee
服饰：Buerlangma、Max Mara、Victor Chan Studio
