博洛尼亞入到決賽，本身就多有多少爭議，結果今日凌晨嘅賽事，依然係四不像，比較懷念泰亞高莫達時期穩如磐石嘅防守。拿坡里嘅表現極具統治性，無論何人突破抑或小組配合今場都可以話係淋漓盡致，唯一不足係臨門一腳，處理得好一點同冷靜一點，斷估比數並唔會如此「細」，尤以凱倫嘅狀態，不妨嘗試一下羅倫素盧卡。艾瑪斯突破凌厲，惜但個人主義重咗d；而本場最佳嘅大衛尼利斯上半場入靚波，下半場嘅捕捉對手犯錯同冷靜處理成2-0，盡見功架！博洛尼亞全場表現最好嘅應該係柯蘇連尼同伊雲費格遜，亦係今季球隊嘅一個縮影。領隊伊泰利安奴始終無辦法改變防線球員患得患失嘅集中力同協防意識（個別球員未有進行緊迫防守變咗免費入場睇波），係阻礙球隊前進嘅極大障礙。原本想讚下有唔錯發揮嘅龍門拉華利亞（Federico Ravaglia），結果下半場就「老貓燒鬚」，同計時炸彈盧坤美上演防線自爆短劇，輸波都係合情合理。恭喜曬拿坡里！🎉繼2014/15球季後再奪該項殊榮，球季首冠以及今年嘅第二座冠軍獎盃，實至名歸。 🇮🇹🏆
